Guiu Garnier a l’onor
Guiu Garnier a l’onor
Lo 18 d’Outòbre, una serada pèr presentar lo recènt libre de Guiu Garnier, Un vilatjon quilhat sus son rocàs, s’es debanada au CEP d’Oc as Ais. Avèm dejà agut l’òucasien de far conoisse aquela òbra qu’es bessai la pus remarcabla de tot’aquelei que nòstre presidènt d’onor a dejà fisat a l’AELOC pèr èstre editada e espandida.
Lou publique a ensin pouscu descubri, pèr la leituro d’uno chausido de sei passàgi, l’évoucacien dóu vilàgi mounte l’autour a passa soun enfànci encò de sei grand. Saurren, pèr lei bèlleis ilustracien que l’agramenton, que si trato de Cournihoun, s’aussant en dessus de la Crau e de la mar de Berro. La vido à l’entour de la guèrro de quaranto s’óufre ensin à nàutrei visto pèr leis uei d’un drole qu’esploro lei sensacien, leis aventuro, lei joio e lei peno de la vido.
Pron d’emocien, pron de simpatié pèr lo monde dau vilagi, mai ges de nostalgié. Guiu saup la duretat dau quotidian qu’an viscut lo monde d’aqueu tèmps, e si fa pas lo chantre dei siècles passats. Mai saup tambèn qu’au nom dau progrès, de tresòrs son estats sagatats, a començar pèr la lenga, e que rèn pòu justifiar d’aguer fach taisar la paraula d’un pòple.
Pèr la gràci de l’imàgi, Jan-Pèire Belmon, que presido desenant lou CEP d’Oc en prenènt la sueito de Marc Audibert, replaçavo Guiéu dins soun envirounamen d’óurigino, e li fasié counta la genèsi dóu libre. A puei pouscu eu meme la rapela direitamen e evouca seis intencien coumo la plaço que soun esperiènci de jouinesso a tengu dins sa vido.
La serada s’acabèt emé la bèla prestacien dau grope Lo Terralhet, que donava una aperçuda de son espetacle Amontanhatge, emé l’interpretacien de doas cançons de Charlon Riéu, Moun Sant Miquèu e A la gardo dóu troupèu, lo segond mes en musica pèr Jan-Pèire Reynaud, em’un cant tradicionau de Vesubia, La Pastressa. L’espetacle si porrà vèire lo 16 de Novèmbre a la Farlèda e lo 23 a n Auruòu.
Data de creacion : 24/10/2013 07:35
Categoria : Çò que fasèm - Collòquis e rescòntres
Pagina legida 17459 còps