En perseguissant vòstra navigacion sus aqueu site, acceptatz l'utilisacion de cookies per vos proposar de contenguts e servicis adaptats. Mencions legalas.
 
 
 
 
Siatz aquí :   Benvenguda » De l’utilitat dei mòstres occitans
 
    Estampar la pagina...
    Estampar la seccion...
 
 
 
 
 

De l’utilitat dei mòstres occitans

 
UN CÒP ÈRA
 
De l’utilitat dei mòstres occitans

Lo bestiari fantastic avena l’imaginari e empura la curiositat de la realitat dau país. S’apren dins lo racònte, coma n’an fach l’experiénça mantunei escolans au nòstre.
 
      " E coma te dison ? "
"…heu ! me dison Eldred, e lo provençau, l’ai chausit que èra ben de faire una lenga de mai, e en mai d'aquò, es una lenga regionala, alòrs es ben de la partejar. A l'ostau, disèm quauquei mòts, e es ieu que leis ai raportats, come : « bonjorn », « grand mercé », e d’autrei. "
 
 
      Lo joine escòlan de seisena ven, amé un dotzenau d’autrei, prendre contacte amé la mitologia provençala, de fes que li a, es verai un pòu revisitada. Se son donats rendetz-vos aqueu jorn a "La Baleine qui dit vague", un teatre per joines de Marselha.
 
      Li a una particularitat, dins son collègi marselhès Longchamp : « Fan tre la seisena doas lengas estrangieras, » explica son professor d’occitan, Sarah, « sovent englés e alemand, de fes que li a tanben anglés e russe » tala Dejali : « c’est la professeure qui est venue nous parler en classe, et j’ai voulu apprendre des mots en oc ». Lemma ela, a chausit occitan d'abòrd que « es bèu », e, am'un polit accent indeterminat, anoncia qu’es Armeniena, nascuda a Moscó. D’origina estrangiera lo mai sovent, aqueleis escolans se tròban interessats per aprene la lenga regionala.

SalamonDamofli2.jpg
 
     
Son venguts aqueu jorn se laissar menar per Rémy Salamon. L’ancian mèstre d'escòla s’es fach contaire, un còp retirat. E a La Baleine qui dit vague, a penjat quauqueis encras e goachas d’Enric Damòfli. Aquest artiste martegau, tròp lèu dispareissut, aviá pintat lei mòstres de la mitologia occitana, coma la Tarasca. Rémy Salamon lei mete en regard amé lei goachas que tornan metre aquelei legendas en situacions contemporanas. Ansin lei Santas-Marias desbarcan uei sur la plaja… en Citröen 2CV. E per ben marcar lo rapòrt mitologia-reau, Damòfli aviá semenat dins sei tablèus, de panèus rotiers triangularis mostrant nòstre bestiari legendari. Si pòu veire ansin un dessin dei ribas dau Ròse am'un panèu « Attention Tarasque !»
 
 
      Dins aquel univèrs, nòstra classa de seisena se laissa menar, e apren come Heraklès empeguèt lei gigants de la Crau, çò que explica ben perque es desempuei tant codolosa… (Legir per aquò l'article dau site sus « L'istòri vertadièra de la naissença de Crau »)
 
      Tot en caminant entremitan lei dessins de Damòfli, se rendèm còmpte que resta encara de camin a faire, per nòstrei joines collegians, per mielh conóisser son païs, qu'es soventei fes un païs novèu. « C’est quoi le mistral ? » s'entendem dire, au mitan d’un cònte. La dròlla que fa la demanda es nascuda pron luench. Darrièr la lenga d’oc, veirà lèu que li a tot un univèrs. De que rendre richa de conoissença e d’imaginari. Repartèm d'aquí encantats. Lo gaubi dau contaire li a ben ajudat, la sensibilitat dau pintre tant ben, e lei bòneis idèias de son ensenhaira tant coma l'estrambòrd dei collegians.
 
 
MN
 
(Aquest article pareiguèt d’abòrd dins lo mesadier Aquò d’Aquí n° 219, en novembre de 2008)
Un espectacle de còntes, La Ràbia dei Dieus, es tanben associat a l’exposicion. Podètz se volètz prepausar a vòstreis escolans ò a vòstra escòla de visitar aquesta exposicion; veire per aquò la rubrica "Projèctes culturaus".



Data de creacion : 26/10/2010 - 14:06
Darriera modificacion : 23/01/2011 - 13:37
Categoria : Ensenhament - Leis articles d'Aquò-d'Aquí per la classa

Pagina legida 11198 còps

Formulari d'adesion a l'AELOc-pagament securisat amé CB

Propulsé par HelloAsso