Siatz aquí :   Benvenguda » Novembre de 2010Assemblada Generala de l’AELOC
    Estampar la pagina...

Novembre de 2010
Assemblada Generala de l’AELOC

Assemblada Generala de l’AELOC - 2010

ostau_de_p.jpg
 
L’assemblado generalo de l’AELOC s’es tengudo lou dissato 6 de Nouvèmbre dins lou tantost à l’Oustau de Prouvènço à-z-Ais. Lei raport d’ativita e financié soun esta aprouva à l’unanimita. L’a ges d’eleicien aquest an, e lou counsèu d’amenistracien emé lou burèu rèston sènso chanjamen.

 
 
I
Bilanç deis ativitats

1. Liames entre ensenhaires

       Lei liames son assurats pèr d’informaciens e pèr de rescòntres. L’informacien passa pèr lo bulletin La Tarasca/La Tarasco, mandat en totei lei membres, tres numeròs dins l’an. Passa tambèn per lo siti de l’associacien, qu’es reguliarament ameliorat, e que recèu de mai en mai de vesitas (mai de 800 en Outòbre, sènsa comptar leis automates). La letra d’informacien es mandada en tot’aquelei que nos donon son mail chasca fes que l’atualitat va necessita. Enfin, un desplegant presentant l’AELOC, seis ativitats, e ce qu’òufre au publique es en trin d’èstre imprimat.

       Lei rescòntres an consistat d’abòrd dins
lo Colòqui de La Fara (Bocas dau Ròse) lo 7 de Novèmbre 2009 sus lo tèma de la lenga d’òc e l’escòla republicana. Aquelei colòquis bisanuaus, organisats pèr l’AELOC despuei mai de vint ans, òufron una manifestacien publica sus un sugèt tocant la trasmissien de la lenga. Lo Colòqui de 2009 recampèt environ 120 personas, emé l’intervencien dau deputat Christian Kert, membre dau grope parlamentari sus lei lengas regionalas, e de Karim Zeribi, cronicaire politique. Avem renonçat a tenir lei colòquis sus lo tèmps escolari, ce que nos dona mai de libertat, elimina lei toristas, e dòrbe la manifestacien a n un publique pus divèrs. Pasmens l’Ispeitor d’Academié lo venguèt dorbir.

       L’AELOC a tambèn organisat
un rescòntre a Pèrnas dins la Vauclusa lo dissata 16 d’Outòbre, dobert au publique en prolonjament d’un estagi de formacien deis ensenhaires organisat pèr nòstra sòci Annette Cottin, cargada de missien pèr la lenga regionala. Lei divèrs moments de la manifestacien an recampat entre 50 e 80 participants. Enfin, l’AELOC a participat au rescòntre deis escòlas provençalisantas de Gardana, organisat pèr l’Ispeicien Academica e bailejat pèr nòstre sòci Roland Boyer e sei colègas de la Missien despartamentala pèr la lenga regionala : ensin lo modèle iniciat pèr leis ancians colòquis de l’AELOC es estat représ pèr l’Educacien Nacionala.


2) Relacien ‘mé leis amenistracien

       L’AELOC participo au Counsèu Academique dei Lengo Regiounalo, em’à la Coumissien despartamentala de la lenga regionala dei Bocas dau Ròse. Aquélei participacien permeton de sousteni un certen noumbre de nouàstei revendicacien, e de coumença d’istala de liame ‘mé leis àutrei partenàri que li soun representa.

       Avèn tambèn mena una acien decisivo pèr fa passa lou posto de cargado de missien en lengo regiounalo pèr lou proumié degrat tengu pèr Annette Cottin d’un mié-tèms à-n-un tèms coumplet. Avem rescountra à-n-aquelo óucasien leis ajoun de l’Ispeitour d’Academié.

       Enfin, avèn mena d’intervencien pountualo à la demando de nòstei sòci, coumo pèr eisèmple sus lou refus dóu Coulègi Barbara Hendricks d’Aurenjo de recebre leis escoulan de la Calandreto pèr manco de plaço, mounte nous es esta douna resoun.


3) Relaciens mé lei politiques

       L’essenciau siguèt lo travalh pèr la proposicien de lèi sus lei lengas regionalas.
Avèm fach assaupre nòstrei demandas en totei lei deputats de la regien, em’ai deputats lei mai implicats dins lo grope de travalh parlamentari qu’a composat lo tèste. Lei modificaciens demandadas pèr l’AELOC son estadas quasiment toteis repressas dins la redacien definitiva. Avèm agit cotria mé la FELCO e comunicat nòstrei proposiciens à l’IEO em’au Felibrige. Receberiam de responsas d’Armand Jung, presidènt dau grope, Marc Le Fur, Guy Teissier, e surtot Jean-Jacques Urvoas, qu’a detalhat lei mesuras que serien modificadas coma sueita de nòstra intervencien.

      Avèm participat a
la letra comuna mandada pèr lo Felibrige, l’IEO nacionau e locau, la FELCO, l’APLR de l’Academié de Niça, e l’associacien Calandreta a Michèu Vauzelle pèr lo felicitar d’aguer emplegat l’espressien « la lenga d’òc » au singulier… Aquela demarcha simbolica a agut lo meriti de rapelar la solidaritat dei pus grandeis associaciens provençalas e nacionalas de promocien de nòstra lenga contra tota tentativa de la presentar sota la forma d’una multiplicitat de lengas diferentas.

       Enfin, avèm remerciat leis elegits dau despartament dei Bocas dau Ròse que nos an sinhalat son sostèn à nòstrei demandas de subvenciens, e que son : André Guinde, Jean-Noël Guérini, Jean-Pierre Bouvier, Bruno Genzana, Alexandre Medvedowsky.


4. Lei partenariat 

       Nouàstei relacien lei pus courrènto s’establisson ‘mé la FELCO, l’IEO, lou Felibrige, e leis Ami de l’Istrucien laïca (FOL) dei Bouco dau Rose, que n’en sian sòci.

       Avèn agu un proumier chàngi ‘mé l’Associacien dei proufessour de lengo regiounalo de l’Academié de Niço, federado coumo nàutrei ‘mé la FELCO.

       Emé l’Assouciacien Culturalo Prouvençalo de Ventabren, qu’ourganiso despuei 50 an lou Grand Près Literàri de Prouvènço, acourda aquest an à nouaste ancian coulègo Joan-Ives Royer, avèn mounta un Grand Près dei Jouine pèr recoumpensa uno realisacien escoulàri. Très classo siguèron chausido, dins l’escòlo Anfos Daudet de Rafèlo, dins l’escolo dei Platano à-z-Ais, e dins la Calandreto d’Aurenjo. (Toutei lei detail dins lei novos dòu siti))

       Avèn toujours agu de relacien sueivido mé certen sindicat d’ensegnaire, mai que mai lou SNUIPP dei Bouco dau Rose, que sa presidènto a pres la paraula au Coulòqui de la Faro ; tambèn avèn de sòci que soun en relacien ‘mé lou SNES e lou SGEN.
       Enfin, à la demando de l’Agènci Regiounalo pèr l’Envirounamen dóu Counsèu Regiounau (ARPE), avèn realisa la traducien en òucitan gavoué de sa publicacien sus La Vipèro d’Orsini.
plaquette_vipere_oc.gif

       Leis acien menado en coumun soun la participacien à la couourdounacien « Anem, òc » pèr la FELCO, e aquélei que soun estado signalado aqui dessus e aqui après.


5. Acien culturala, difusien de libres



       Aquela partida importènta de nòstra acien repausa mai que mai sus l’intervencien de Romieg Salamon e Jan-Pèire Reynaud. Un novèu catalògue es estat editat en 2009 e espandit. Vaquì lo detalh deis aciens :

-Viradas teatralas en mitan escolàri : en colaboracien mé lo Teatre de la Rampa, l’espetacle Lo lop coma una ombra dins la nuech a concernat 56 classas, pèr 3 colègis e 14 escòlas ;

-Progèt « Faire parlar lo païs », animacien e espetacle a l’entorn de l’esposicien « La Rabi dei Dieus » ilustrada pèr lo regretat Enric Damofli : pèr 19 classas, 4 escòlas, 2 colègis, 1 licèu.

-Animacien Carnaval tradicionau : 9 obradors en escòla mairala, 42 en elementari, 7 passa-carrieras.

-Animaciens escolaris pèr lo conte tradicionau : pèr 4 classas mairalas e 20 elementaris.

-Participacien ai Cantejadas : aquela manifestacien que si tèn cada anada au Jaç de Boffan as Ais a recampat aquest an 503 pichons de 19 classas mairalas e elementaris.

-Difusien de libres : Pas d’edicien de libre novèu aquest an, mai continuacien dau
servici de difusien e vènta pèr correspondènci.

II
Bilan financié

Après la presentacion dei còmptes per lo clavaire, lo rapòrt financier es estat aprovat a l'unanimitat.

III
Lei progèts pèr 2011

D’un biais generau, l’AELOC entènde contunhar l’acien engajada sus l’ensèms de sei progèts. Vaquì ce que serà especialament desvelopat.

1. Liame entre leis ensenhaires 

       Lo siti informatique serà desvelopat en partenariat mé lo jornau Aquò d’Aquí, que proposarà una banca de donadas de tèstes tocant lei questiens de societat (espòrt, cultura, desvelopament, aparament de l’environament, patrimòni, etc).

       Lo Colòqui bisanuau serà organisat en Novèmbre 2011. Puslèu que de cercar de lo far virar d’un endrech a l’autre, ce que supausa cada còup de recèrcas e d’esploraciens dau mitan d’acuelh que despasson nòstrei fòrças, es estat decidat, pèr autant que la vila de La Fara nen serà consènta, de perenisar l’istalacien d’aquela manifestacien dins aqueu luec comòde, bèn acessible, e monte avèm totjorn rescontrat lo melhor acuelh. Lo tèma dau colòqui serà : es que la lenga d’òc pòu contribuar au desvelopament duradìs ? La preparacien serà menada entre autres mé l’Agenci Regionala pèr l'Environament.


2. Relacien ‘mé leis amenistracien 

       La situacien dóu posto de carga de missien pèr la Vau-cluso es panca reglado definitivament. Lou mié-posto es esta coumpleta aquest an à titre prouvisòri. Fau aro qu’aquelo situacien siegue regularisado. L’AELOC contuniara de sueivre de pròchi aquéu proublèmo.

       Deuren tambèn metre en plaço uno relacien pus reguliero entre lei participant au Counsèu Academique dei lengo regiounalo pèr arriba autant que poussible à de plataformo coumuno.

       L’AELOC va sousteni pròchi lou Reitour la demando d’uno counvencien mé lou Counsèu Regiounau sus lou moudèle d’aquélei que soun estado signado dins d’àutrei regien de lengo regiounalo.


3. Relaciens mé lei politiques

       La destinada de la proposicien de lèi sus lei lengas regionalas risca de demandar encara d’èstre tenguda d’a ment jusc’au sucès finau que resta mai que mai ipotetique.

       La disparicien de la lenga vivènta (estrangiera e regionala) dau concors de recrutament ordinari dei professors d’escòla aclapa completament tot lo sistèma de formacien iniciala deis ensenhaires. Son restablissament, previst d’alhors pèr lo progèt de lèi, es una questien vitala, e deurem començar una acien intènsa pròchi lei politiques pèr que l’espròva de lenga regionala, prevista dre la costitucien deis IUFM, siegue restablida avans meme que la lèi òublige de va faire.

       Enfin, emé nòstrei partenaris, contunharem de defendre l’unitat de la lenga d’òc contra tota tentativa de presentar nòstra lenga coma una familha de lengas separadas.


4. Acien culturalo, edicien

       Lou proujèt de teatre escoulàri ‘mé lou Teatre de la Rampo sera óufri aquest an en 48 classo de Vau-cluso, de Var, e dei Bouco dóu Rose.

       Leis animacien « Conte de Prouvènço, Festo à l’Escolo, e Carnava contunien d’èstre proupousado. Lou proujèt « Faire parla lou païs » aura lué aquest an à Digno e dins leis Aup de Prouvènço Auto, emai à Bouleno, pèr leis escolo, coulègi e licèu.

       Enfin, lei Cantejado seran proupousado à de classo voulountàri de la regien. Lou proujèt counouissera una estensien impourtènto : sera ourganisa sus dous ans, ‘mé de councèrt en divèrs endré pèr acueie tóutei lei classo participanto, puei un grand recampamen à-z-Ais pèr 20 classo seleiciounado.

       Dins lou douméni de l’edicien, seren mai partenàri deis Edicien Grandir, que mandon uno couleicien de « Conte de Prouvènço », que dous seran revira en prouvençau pèr l’AELOC e tira à 500 eisemplàri : si trato de l’Ase Rauba e dei Tres Galino.

      Nouaste presidènt d’ounour Gui Garnier vèn d’acaba un segound recuei de nouvello, Un Vilajoun quiha, que sera edita coumo lou precedènt.

       Continuaren nouaste partenariat ‘mé l’ARPE en revirant uno nouvello publicacien siéuno sus la Tartugo d'Hermann.

       Sian en trin de metre à l’estùdi l’adatacien prouvençalo de la metodo « Euro-Mania » d’ensegnamen simultanèu dei lengo roumano pèr l’ensegnamen primàri, beileja pèr Pèire Escudé, proufessour à l’Universita de Toulouso qu’a deja integra l’òucitan lengadoucian (20 librihoun pèr leis escoulan, caièr d’eisercìci, sìti internet pèr leis enregistramen). En meme tèmps estudiaren lou biais de fa intra l’òucitan dins la nouvelle versien de la metodo pèr adulte Eurom5, que coumpren aro lou catalan.


Data de creacion : 01/12/2010 08:16
Darriera modificacion : 12/05/2013 11:33
Categoria : Archius - Vida associativa-2010
Pagina legida 13573 còps

Reaccions a n'aquest article

Degun a pas encara laissat de comentari.
Siatz doncas lo primièr !

Formulari d'adesion a l'AELOc-pagament securisat amé CB

Per 2024

Propulsé par HelloAsso