Lo garniment dau cavalier

EDAT MEJANA
Un cavalier e son garniment
 
      Faliá pas sofrir de la calor per èstre cavalier a l'Edat Mejana. Que per aparar lei còps d’espasa, sagetas e lanças, devián s'estubar dins una vertadièra batariá de cosina ! Explicacions just après l’assaut, au Casteu dei Baus.
 
 
2011chevalier.jpg

      Lo cavalier sestian Tomàs vèn tot bèu just de s’entornar de la segonda crosada e, per pas perdre la man, a conquistat lo castèu dei Bauç. Ara lo vesèm après la batalha, quora se lèva lo garniment. « Offff ! crebavi de caud aquí dessota. » Urós de veire qu’avèm escapat aquela Edat Mejana, e que jamai pus te fabregaràn de cassairòlas integralas de ferre blanc, coma aquelei que lei gents d’armas rebolhissián dedins sota lo soleu. E fau pas crèire, lei cavaliers podián pron bolegar tot cargats qu’èran de l’armadura pesanta… un còp montats son son roncins ò son detrier. Tant vau mielhs per balhar l’assaut còntra lei barris. Vaquí coma s’èra vestit, nòstre cavalier nòble.


L’eume
      Sus lo cap, pòrta una coifa d’arma de fiu de canebe per amortir lei còps sota son casco. L’an fach de ferre, amb un nasau, per s’aparar lo nas e laissar veire librament. Aqueu casco s’acompanha d’una còta d’arma que para leis espatlas e lo còle. Vos disi pas lo caud qu’endura ansin arnescat.


Lo gant
      A la man se passa un gantelet de cuer ambe de platas (fuelhas metalicas) bèn agençadas leis unas sus leis autrei, e que se remonta sus lo braç. Man e dets se pòdon mòure pron aisat sota aqueste gardabraç.


L’espasa ò lo brant
      Aquela espasa leugiera es especiala per menar l’assaut, corteta e còrba, e rompre lei cascos dei defensors d’una man, quora l’autra deu tenir lei barrons de l’escala. Son aspèct es pas comun, que l’espasa a la forma d’una crotz per lei cavaliers crestians, coma a la forma d’una miejaluna per lei cavaliers maometans. Autanbèn, es rare de veire aquò sus un cavalier d’Occident, mai leis escambis internacionaus devián servir per melhorar lo materiau, qué !

Article confiat pèr lo mesadier Aquò d'Aquí, http://www.aquodaqui.info/
 

Data de creacion : 22/09/2011 17:55
Darriera modificacion : 22/05/2013 18:26
Categoria : - Leis articles d'Aquò-d'Aquí per la classa
Pagina legida 23993 còps
 

Formulari d'adesion a l'AELOc-pagament securisat amé CB

Per 2024

Propulsé par HelloAsso