Dins li piado de Mirèio
Dins li piado de Mirèio
Lou cènt cinquantième anniversàri de Mirèio a vist flouri mantùneis iniciativo, qu’entre élei leis ensegnaire destriaran especialamen l’albon richamen ilustra publia pèr nouàstrei coulègo de l’assouciacien Lou Prouvènçau à l’Escolo, qu’adato pèr lou publique escoulàri uno versien alóugeirado dóu pouèmo de Mistral, incluènt mai d’uno citacien de l’óuriginau, e acoumpagnado d’un librihoun proun drud pèr l’esplata en classo, que s’apueio sus l’obro memo, chant après chant, en proupousant de situacien pedagougique e d’aport d’infourmacien, qu’uno partido n’es sintetisado dins un caièr centrau destacable. Enfin un CD aneissa à l’albon presènto lei raconte emé lei cansoun, interpretado pèr l’ensèmble Tard-quand-Dine.
Sauren grat eis autour de s’èstre counfrounta à-n-un desfis ambicious eitant que necessàri, tant Mirèio juego un role foundadou dins lou desveloupamen d’uno counsciènci òucitano mouderno, e tant es verai que noumbrous soun nouàstrei coulègo qu’esiton davant l’empacho de sa coumpleissita dins l’estat que s’atrovo tròup souvènt la trasmissien escoulàri de nouastro lengo. Aquelo publicacien courajouso li dounara d’armo pèr si l’ataca.
- Dins li piado de Mirèio. Sous la direction de Nathalie Seisson. Album et livret pédagogique. 17 et 80 p. Lou Prouvençau à l’Escolo. 2009. Nathalie Seisson, 54, rue Notre Dame, 13 910 Maillane.
-S