Aquéu chantié, pèr qunte lou Reitour Jan-Pau de Gaudemar e l’AELOC partajon la mema passien, vèn de douna lue a douei publicacien de grando valour, qu’an l’avantàgi de plaça la lengo d’o au centre de la proublematico, alor que lei publicacien deja en circulacien au nivèu deis adultes si cantounon quàsi esclusivamen ei lengo naciounalo.

       La proumiero, obro de nouàstrei coulègo Isabèu Paganon-Catayée e Estève Ferraioli coustitué uno sensibilisacien fouarço eficàci à l’unita dei lengo neo-latino e à l’aproupriacien d’un certen noumbre de carateristico coumuno, partènt de sièis sequènci foundado caduno sus un tèste sueivi d’una esplatacien detaiado, l’ensèmble estènt preceda d’uno presentacien bèn esplicito de la genealougié dei lengo roumano e de la demarcho d’intercoumprenesoun.

      La segoundo, elabourado souto lou gouvèr dóu Proufessour Glàudi Mauron, si coumpouso d’un leissique ourdouna pèr champ semantique, e presentant una seleicien de mot dei principàlei lengo roumano, incluènt la nouastro, indicant pèr cadun l’etimoun latin, sueivi d’uno chausido de tèste literàri òufrènt un large ventau de versien dins lei diferèntei lengo neo-latino.

      Sera aprecia qu’aquelei dous oubràgi respeton escrupulousamen un perfèt ecumenisme en presentant pèr chasque item lei douei grafié classico e mistralenco.