PÈR AJUDAR AQUELEI QU’APRENON LA LENGA

Lo burèu de l’AELOC a decidat de proposar a n aquelei que s’engajon dins un projèt serios d’iniciacien a la lenga d’òc pèr un travalh personau de lei metre en relacien cadun m’un membre volontari de l’AELOC pèr li donar una ajuda dins sa demarcha.

Soun soulicita pèr va faire lei coulègo ensignaire en ativeta o retira, mèmbre de l’AELOC, e aguènt uno counouissènço sufisènto de la lengo pèr ajuda à n’en prougrama l’aproupriacien. Sera douna priourita, dins l’ordre d’arribado dei demando, à-n-aquélei qu’an un besoun proufessiounau d’aprendre la lengo, pèr eisèmple lei mèstre d’escolo candidat à la validacien de sei coumpetènci en lengo regiounalo pèr poustula à de poste especifique, mai l’ofro es facho pèr touto persouno qu’a la voulounta de s’aproupria la lengo, dins la limito dóu noumbre d’ajudaire dispounible.  

La relacien entre l’aprenènt(a) e son ajuda an naturalament de s’organisar librament. Nos sèmbla que l’aprenènt(a) a de si chausir (eventualament emé nòstra ajuda) una metòda de referènci pèr travalhar solet(a), e lo tutorat si pòu imaginar coma un rescòntre (in praesentia o a distanci) entre lei dos pèr mesurar la situacien de basa e programar lo travalh, limitat à n una anada escolari eventualament renovelada, cadenciat pèr de moments monte s’escandalha la progressien e s’esclargisson lei confusiens e dificultats.

L’aprenènt(o) dèu agué la poussibilita de questiouna soun ajudo sènso la secuta, à de moumen counvengu, e li pòu èstre óufri de tèms de counversacien pèr metre le lengo en mouvamen, emai touto formo d’ajudo à l’aprendissàgi imaginado entre lou tutour e lou beneficiàri.

Lei rescòntres pòdon si faire dins leis endrechs convenguts d’un comun acòrd, l’Ostau de Provença e lo CEP d’Oc as Ais estènt disponibles pèr aquelei que nen son pròchis. L’AELOC pòu tambèn provesir a grati de liames Zoom. Lo tutorat es benevòle pèr lo tutor e a grati pèr lo beneficiari, en qu serà solament demandat una adesien a l’AELOC (10 €).

Aquelei que vòlon beneficiar de l’òfra an de si far conoisse pròchi l’AELOC pèr mail (aeloc-bureau@aeloc.fr) o pèr lo formulari  de contacte dau site o l’adreiça postala que li es indicada (https://www.aeloc.fr).