En perseguissant vòstra navigacion sus aqueu site, acceptatz l'utilisacion de cookies per vos proposar de contenguts e servicis adaptats. Mencions legalas.
 
 
 
 
Siatz aquí :   Benvenguda » Assemblada generala de 2013: Rendut-còmpte
 
    Estampar la pagina...
    Estampar la seccion...
 
 
 
 
 

Assemblada generala de 2013: Rendut-còmpte

ostau_de_p.jpgRendut-còmpte

Bilanç anuau e perspetivas de l’AELOC

Rendut-còmpte de l'Assemblada Generala
dau 22 de junh de 2013, Ais-de-Provença


      L’assemblado generalo de l’AELOC siguè coumo d’abituda l’óucasien de faire lou bilans de soun acien dins l’annado escoulàri e de defini lei proujèt d’aveni.

Leis ativitats

      L’atualitat politica mena l’AELOC a intervenir regulierament pròchi lei poders publiques, e pèr leis elegits v’a fach mai que mai sus dos tèmas : la presènci de la lenga dins lei tèstes legislatius, e promier aquest an dins la lèi de refondacien de l’escòla ; la defensa de l’unitat de la lenga atacada pèr lei partisans de son espeçament. Pèr l’administracien, son acien regarda lo Consèu Academique de la lenga regionala, la comissien despartamentala dei Bocas dau Ròse, e seis intervenciens dins la Vauclusa contra la divisien pèr dos dau pòste d’animator en lenga regionala, qu’es estat definitivament creat sus un tèmps plen pèr la rintrada que vèn. Avèm enregistrat de sucès sus tot’aquelei ponchs, e l’acien siguèt coma de costuma menada emé nòstrei partenaris abituaus, mai que mai lo Felibrige, l’IEO, la Federacien deis Obras Laïcas e nòstra federacien nacionala, la FELCO. 

      Coumo es naturau pèr uno assouciacien d’ensegnaire, l’atencien principalo de l’AELOC si pouarto sus l’aprendissàgi de la lengo. L’ajudo au mitan escoulàri li tèn la proumiero plaço. Lou desplegant que presènto lei proupousicien de l’AELOC en matèri culturalo siguè manda aquest an en tóutei leis escolo dei Bouco dóu Rose e de Vau-cluso. 32 demando d’intervencien n’en siguèron la counsequènci. L’evenamen lou pus espetaclous siguèt la realisacien dei Cantejado à-z-Ais que meme despassè aquest an soun sucès abituau.

      L’AELOC donèt tambèn d’ajudas a de progèts montats a l’iniciativa deis establissaments que li an semblat particulierament importants, siegue soleta, siegue en partenariat emé d’autrei : ensin de sa participacien au Grand Pres Literari de Provença pèr sa partida consacrada ai progèts escolaris, en ligason emé l’Associacien Culturala Provençala de Ventabren. 7 progèts siguèron ensin ajudats.

      Pròchi lou publique adulte, 4 acien siguèron mountado au noum de l’AELOC. Uno acien de fourmacien dóu persounau de l’Agènci pèr l’Envirounamen de la regien Prouvènço-etc si debanè tout dóu long de l’annado à-z-Ais ; uno iniciacien au prouvençau siguè assurado à l’Ostau dau País Marselhés ; en partenariat emé d’assouciacien loucalo, uno iniciacien au prouvençau e à la culturo óucitano siguè proupousado à Ventabren, e avèm participa à l’estàgi mensuau de pratico de la lengo que si debano despuei d’annado à Cucuroun, pèr dous groupe, l’un de debutant e l’autre d’un nivèu pus avança.

      L’anada siguèt tambèn marcada pèr la publicacien d’un albom de Còntes de Provènça, mes en lenga pèr Betty Allasio, Mirelha Combe-Trinquier, Jean-Pierre Reynaud e Romieg Salamon ; tambèn pèr la sortida dau libre de Guiu Garnier, Un Vilatjon quilhat sus son rocàs ; e enfin la parucien de la brocadura de l’ARPE sus la Tortuga d’Hermann traducha en provençau au nom de l’AELOC pèr lo Majorau Jan-Lu Domenge.

      Enfin participeriam à divèrsei manifestacien culturalo, entre àutrei lou Marcat de Nouvè à-n-Arle, la Librejado ourganisado à Marsiho pèr lou Felibrige, lou Coulòqui dóu CREDDO à Gravesoun, lou Festivau dóu Libre de Conte li 25 e 26 de mai 2013 à Marsiho.


Bilans financié

      Lou bilans financié mouostro que lei comte soun en equilìbri e que l’AELOC dispouso dei ressourço courrespoundènt ei proujèt engaja. Lou bilans financié es adòuta à l’unanimita, coumo v’es esta lou bilans d’ativita.

Progèts e perspetivas

      D’un biais generau, l’AELOC countunharà d’assurar seis intervenciens abitualas coma v’a fach precedentament.

      Pèr ce que regardo lei proupousicien eis escolo, lou nouvèu catalogue es en trin d’èstre alesti. L’ajudo ei proupousicien deis establissamen sera countinuado seloun lei demando e lei mejan que n’en dispousaren. Travaian tambèn sus un proujèt d’edicien dau temougnàgi d’un emigrat italian dins la regien marsiheso au XIX° siècle, recentamen edita dins sa vilo d’óurigino, que permetrié de pourgi un doucumen ouriginau sus aquelo realita importènto de l’istòri prouvençalo.

      Enfin, l’AELOC a renounçat de faire aquest an son colòqui bisanuau pèr si jonhe au progèt de la coordinacien Anem, òc, que recampa emé nàutrei IEO, Felibrige, APLR de l’Academié de Niça e Calandretas. Participarem adonc au Colòqui dau dissata 30 de Novèmbre au Palais dau Faròt à Marselha, sus lo tèma Un avenir pèr nòstra lenga, la lenga d’Oc-Occitan, dins la regien Provença-Aups-Còsta d’Asur. Aquela manifestacien es destinada a presentar ais elegits de la regien la situacien atuala de ce que si fa en Provença pèr la lenga, lei realisaciens dins leis autrei regiens de França, e proposar eis elegits e ai decidèires de la regien de modalitats d’acien coordonadas sostengudas pèr totei lei militants dei diverseis estruturas de promocien de la lenga d’òc en Provença.


Eleicien deis amenistratour de l’AELOC

      Siguèron elegi pèr dous an :

Mireille COMBE-TRINQUIER
Annette COTTIN
Frédérique DURAND
Mireille JOUE
Claudette OCCELLI
Nathalie WURBEL
Alexandre ARNAUD
Alain BARTHELEMY-VIGOUROUX
Joël BOUC
André FAURE
Gilles MAILLE
Michel NEUMULLER
Mathieu POITAVIN
Michel PRAT
Jean-Pierre REYNAUD

      Soun elegi ei founcien de dirigènt :

Presidènto : Mireille COMBE-TRINQUIER
Vìci Presidènt : Nathalie WURBEL, Gilles MAILLE, Michel NEUMULLER
Clavaire : Jean-Pierre REYNAUD
Secretàri : Alain BARTHELEMY-VIGOUROUX
Secretàri Ajoun : Alexandre ARNAUD



Data de creacion : 08/07/2013 - 14:32
Categoria : Archius - Vida associativa-2013
Pagina legida 13771 còps

Formulari d'adesion a l'AELOc-pagament securisat amé CB

Propulsé par HelloAsso