En perseguissant vòstra navigacion sus aqueu site, acceptatz l'utilisacion de cookies per vos proposar de contenguts e servicis adaptats. Mencions legalas.
 
 
 
 
Siatz aquí :   Benvenguda » Lei jornadas de Perna,rendut-còmpte
 
    Estampar la pagina...
    Estampar la seccion...
 
 
 
 
 

Lei jornadas de Perna,
rendut-còmpte

Rendut còmpte dei Jornadas per l’ ensenhament de la lenga regionala
dau 13 au 16 d'octòbre de 2010
PERNA-LEI-FÒNTS


 
P1010473site.jpg

 

       Aquelei jornadas son estadas  organisadas per l’A.E.L.Oc per encorajar l'espandiment de l’ensenhament de la lenga d’òc dins leis escòlas mairalas e elementaris de la Vau-clusa e crear un malhum d’ensenhaires, per se rescontrar, escambiar son experiença professionala e pedagogica dins aquest aprendissatge.

Aqueu malhum serà , per la seguida, animat per dòna Annette Cottin, encargada de mission per l'Educacion Nacionala per aquest ensenhament.

Dimècres 13 d'octòbre:
       Una jornada fòrça bòna a l’escòla elementari Jean Moulin.
    Accuelh mai que mai calorós dau director de l’escòla que se metiguèt a nòstra disposicion per nos ajudar.
    Un grope de vingt ensenhaires, motivats e desirós d’aprendre e de faire.
    Un interès dei fòrts per leis accions de l’ A.E.L.Oc, subretot dins lo domeni de l’edicion (venda d’alboms) e dins lei proposicions d’intervencions culturalas dins leis escòlas.

P1010467site.jpg

Dijòus 14 e divèndres 15 d'octòbre:
      Accuelh a l’Espaci Joinessa Municipau de Perna de sièis classas vengudas deis escòlas de Perna, Bedoin e Merindòu.
Èron unèi 160 dròlles apetugats per una visita contada (bilingüe) de l’exposicion : « La ràbia dei dieus … »

ExpoRabia_007.jpg

Dissate 16 d'octòbre: Après-dinar dubert au public a l’Espaci Joinessa Municipau.
       Sospressa de trovar sus lo lindau de la pòrta un comitat d’acuelh composat de dos papets e quatre mametas pegant d'afichas quasiment insultantas còntra l'organisacion d'aquesta jornada ! Assai de lei faire s'en anar, puei abandon, mai n'aguèron lèu son gonfle e s'en anèron solet un còp que lo monde fuguèron dintrat dins la sala. Un polit efèct ! Aquela "manifestacion" marquèt ben de cu costat èran bestitge e sectarisme, come nos l'a confirmat l'ensemble unanime dei participants !

       Demié leis assouciacien counvidado de veni presenta sei realisacien, l’avié : Lou FELIBRIGE, Lei Carnet dóu Ventour, La « Calandreta – la Granatiera», l’I.E.O 84, Leis Estùdi Coumtadino, la biblioutéco pedagougico de Nioun emé l’A .E.L.Oc.

P1010468site.jpg              P1010466site.jpg

An pas respoundu à nostro counvidacien : Lou Prouvençau à l’Escolo, Prouvençau lengo Vivo e lou C.R.E.D.D.O

Arrivada fòrça escalonada dau monda que son fin finala un cinquantenau au moment dei discors e dei presentacions.

Acuelh fòrça reüssit, en provençau, de M. lo Cònse de Perna, que tenguèt un discors de granda dubertura, convidant lei tenents dau « O » e aquelei dau « A » a parlar e faire viure sa lenga ensems.

P1010456site.jpg
       Presa de paraula de M. Jean Jack GRENET  - representant M. L’Inspector d’Acadèmia.
Maugrat lei lentors e dificultats de messa en plaça que li pòu aguer dins l'Educacion Nacionala, diguèt tot l’interès que l’Inspeccion Academica de la Vau-clusa portava a l’ensenhament de la lenga regionala. Remercegèt l’A.E.L.Oc per son engatjament e son sostèn dins la messa en plaça d'aquest ensenhament.

 
P1010459site.jpg

 
       Dòna Mirelha COMBE donèt puei la paraula a Romieg SALAMON que presentèt lo debanament dei tres jornadas consacradas ais ensenhaires e ais escolans. N’aprofichèt per gramacejar l’ Inspeccien Academica de Vauclusa d’aguer poscut trobar aquest an, una solucien per que lo pòste d’encargat de Missien Lenga e Cultura Regionalas siágue a tèmps complet.
Ramentèt tanben lei demarchas entrepresas per lo FELIBRIGE e l’A.E.L.OC qu’argumentèron pròchi l’Inspector d’Academia sus la necissitat d’aquèu pòste.

 
P1010461site.jpg


       Dóna Aneta COTTIN, encargada de mission lenga regionala dins la Vau-clusa, representava mossur lo Rector d’Acadèmia e mossur Claude Mauron, conselhier dau Rector. Excusèt son absenci a n'aquesta jornada e diguèt tot l’interès que  portián a nòstra òbra.

       Dono Glaudeto OCCELLI representavo lou Capoulié dóu Félibrige, qu’èro empacha. D’un biais mai persounau e afectiéu, evouquèt lei difficile coumençamen de l’ensignamen de la lengo d’O dins lou despartamen  de Vaucluso e  lou long caminamen pèr arriba a n'aquesto recounouissènço ouficialo.

       Dòna Mireille COMBE, presidenta de l’ A.E.L.OC a gramacejat totei lei participants e a durbit lei trabalhs en convidant chascun a jónher leis ataliers prepausats.

Atelié:
       Atelié « danso » anima pèr Cécilo NICOLAS de l’assouciacien « Dançar au País », 7 participant soulamen.
       Atelié « cant » anima pèr Estefan MANGANELLI, 7 participant, que siguèron rejoun pèr lou « Duo Cheops » que n’en saludan l’amistouso vesito.
       Atelié « toupounimio », anima pèr Pau PEYRE, proufessour ounouràri, que recampè à l’entour dei cadastre e anciano carto de Perno-lei-Font : mai de quaranto persouno, que la majo part èron de perneso e de pernès.

 
P1010463site.jpg             P1010465site.jpg

Conferéncia:
       La charradissa-debat sus l’intercompreneson entre lei lengas romanas, que l’intervenant previst posquèt pas venir, fuguèt animada per M. Jean-Jack GRENET, Inspector de l'Educacion Nacionala de la circonscripcion de l’Illa-sus-Sòrga e Annette COTTIN, encargada de mission lenga regionala e lengas vivas per la Vau-clusa. Aquelei comunicats fuguèron seguit per un interessant debat qu'un quarantenau de personas li participèron.

Aperitiu:
       A l'entorn d’un aperitiu ofèrt per la Comuna de Perna e de pizzàs comandadas per l’ AELOc, lei participants perseguiron seis escambis e partejèron un moment dei mai agradiu.

Espectacle:
       L’ espectacle "La ràbia dei dieus…" presentat per  Lo Terralhet, siguèt un polit viatge dins lei pantais e la poesia, una escapada agradiva lòng de Ròse. Siguèt lo moment de mai fòrta frequentacien, amé 80 espetators que solament un trentenau aviá segit leis ataliers e conferèncias de l’après-miejorn.

 
Rabiadeidieus.jpg
 
Balèti:
       L’espetacle acabat un vintenau de dançaires an clavat aquelei jornadas de Perna-lei-Fònts au ritme dei farandolas, deis escotishes, dei polkà e dei corentas … au son dei galobets-tamborins, de la viela a roda e de l’accordeon dei quatre musicaires de « Lo Terralhet ».

 ************************

        Mercí grandament a la Comuna de Perna-lei-Fònts per sa participacion activa, que tre lo despart nos a ajudat, sensa vertadierament nos conóisser. Un accuelh mai que mai bòn, la mesa a nòstra disposicion d'una sala amé seis equipaments tecniques e dau materiau, amé la presença, durant una bòna partida de la jornada dau 16 d'octòbre de M  Lo Conse e de dos elegits.


Data de creacion : 22/10/2010 - 14:24
Darriera modificacion : 17/02/2012 - 18:27
Categoria : Archius - Projèctes culturaus-2010/2011

Pagina legida 12164 còps

Noveutats dau site

(despuei 45 jorns)
Informacions/Nòvas